Il colleghium consista da persunas d’instrucziun motivedas cun üna fich buna furmaziun professiunela. Per la SMEO (MSO) es que fich important cha las lecziuns vegnan dedas da persunas d’instrucziun cun üna furmaziun musical-pedagogica. Persunas, chi vöglian gnir ingaschedas, haun da passer ün’audiziun ed ün temp da prouva. Actuelmaing instrueschan 26 persunas cun stüdis a conservatoris, scoulas otas da musica, academias ed otras instituziuns correspundentas.

Dapü cu 50 ans experienza da nossa scoula da musica daun perdütta d’üna lavur cuntinuanta.

Nus mettains pais sün metodas d’instruir e d’imprender modernas, perque organisains nus regulermaing furmaziuns internas cul tema instrucziun, e nus sustgnains e promovains a nossas collavuraturas e noss collavuratuors in lur intent da’s perfecziuner professiunelmaing. Ün prezius effet secundar: Las persunas d’instrucziun survegnan nouvs impuls e barattan experienzas traunter pêr.

Scha’s fo qualchosa cun plaschair, alura s’es motivo. Per ragiundscher quist böt spordscha la SMEO (MSO) il suner in gruppa, champs da musica, concerts da scolaras e scolars e tests da s-chelin. Üna plazza prominenta ho tar nus es eir la promoziun da talents. Regulermaing sustgnains e promovains nus a scolaras e scolars dunos chi haun l’intenziun da’s parteciper a concurrenzas regiunelas e naziunelas. Ils resultats conferman nos agir.